السمكة والدفان.
قصة.
مقبرة يحدها نهر من جهة وتدور من حولها حلقة كبيرة من بيوت منظرها كريه تم بناؤها بفوضوية وكأنها قبور أختار اهل أمواتها أن تكون مميزة البنيان كي يصلون اليها بسرعة فالمقبرة تكبر كل يوم والموت لايتوقف.. وقد يتيهون في زيارة موتاهم.
يجلس قرب احد الاكشاك رجلان كان احدهما يعيد طلاء رقم هاتف على مقدمة الكشك وبأسمين أمين وناصر للاتصال عند الحاجة.
أما الاخر فكان ممتعضا يهز برأسه غضبا وهو يصك أسنانه بمرارة.
فقال ألاول أمين : اخوية ليش تلح هسه الموت قابل خلص خيرها بغيرها.
أجابه الثاني ناصر: ذوله الناس كل موتاهم اني دافنهم وينطون هواية اكرامية لويش يركض گبلي لو مااخاف تصير مشكلة چان ابهذله بس هالمره يطلعون قهرهم براسي.
أمين : تريد اگله ينطيك من اللي حصله.
نظر اليه ناصر بغضب وقال: والله اضربهن بوجهه ليش اني مكدي.
أمين: لاحول ولاقوة الا بالله. هو منو مثل المكادي كلها بالدولار تشتغل,براحتك عوفه الله يعوضك.
(صمت الاثنان)
مرت ساعة من نهار واقتربت الظهيرة حيث توسطت الشمس السماء,تأهب الاثنان للنهوض حين جاء رجل اخر نحوهما , فاشاح ناصر وجهه ممتعضا .
السلام عليكم ..قالها القادم.اجابه امين وهو ينظر الى ناصر بحنق قائلا: ناصر جاوبه للرجال .
ناصر: حسن ليش تبوك رزقي؟
حسن: يمعود گلك فلوس بس لاتزعل خمو خلصت الشغلة وبعدين أشو صارلنا سنين ندفن بهلناس وبعدنا على الفُگُر أبا عن جد.
ناصر: اي والله صدك! الله كريم .
حسن: الشغلة اللي تجيني الك وتدلل بس لاتزعل يمعود ناصر انت اذا متت آني ادفنك ببلاش واني اذا متت هم تدفني ببلاش صح لو غلط؟
ناصر: شيجيب الموت علينا.
يضحك الثلاثة ..ويقول ناصر: اريد اروح للبيت اتغدى ,اودعناكم.
وماان تهيأ ناصر للذهاب حتى اقبلت سيارة نحو المقبرة و نزل منها رجلان ووقع نظرهما على الرجال الثلاثة فاقبلا عليهم.
السلام عليكم : اجاب الثلاثة السلام واكملوا بسرعة "بالخدمة"
قال احدهما: حضرولنا خمس گبور وتعالوا شوفولنا المكان.
ناصر : ياستار شنو حادث لو انفجار ؟
اجابا: عبوة بباب البيت وانطبگ عليهم وهُمه فقرة وماعندهم احد كُلهم ماتوا الرجال ومرته والجهال.
قال الثلاثة: لاحول ولاقوة الا بالله العلي العظيم. يلله يابه امشوا شوكت تفض هالمصيبة.
احدهما: متفض لأن السمچة خايسة كلها للذيل.
ناصر: من عمري عشر سنين اني دفان وهسه عمري فوك الاربعين والحال نفسه وماشالله على الگاع تبلع وتعرض .لو اعرف اشتغل غير شغلة چان بدلتها,شوف خوية ذوله داير مدايرك كلهم عوائل ,چانت تجي فد مرية تظل مكابلة كبر واحد وتبچي كل جمعة والدنيا مكلوبة انفجارات وقناصين جيت عليها حچيت وياها وخليتها تمشي تشوف العوائل بكاملها مدفونة حتى اللي عمره چم شهر مخلص من الاعدام وبالكصة كتلها بعد لتجين احمدي ربچ بس واحد . منين طلعونا هل الارهابيين الجايفين غير من بطن السمچة اللي حچيت عليها.
الرجلان: اي احنا هم راحلنا هواية من گرايبنا هو مطرالسوء ونزل على الروس,هنا يابة مكان يوسعهم كلهم ,احفروا علما نجيبهم من الطب العدلي .
ذهب الرجلان.
استدار الثلاثة امين وحسن وناصر نحو گشك العدة .
قال ناصر: حسن لا أطلبك ولا تطلبني ذول دفنتهم علينا يعني بلاش.وبالعافية على السمچة الچايفة ..
خل تشبع سم وزهر واحنا نموت جوع بدالها.وشكوري ابني ميرضى ياكل صمونة وحدها يكول متحبوني, والله انعل ابوك لابو الخلفك هو انت تاليتك دفان اكل واسكت .
ضحك الثلاثة وقال امين : اي هو هم هيج .يلله احفرو.
............
